Elekshon na Boneiru, Saba i Sint Eustatius den Idioma di seña Hulandes ku boka na Papiamentu (NGT-PAP). E video aki ta splika kon bo por bai vota na Boneiru, Saba i Sint Eustatius.
Mi tin mag di vota?
Tur Hulandes tin mag di vota for di 18 aña.
Vota no ta obligatorio.
Si bo a komete un delito den pasado, tin listá den lei si bo tin mag di vota ahinda. Un hues por disidi si bo tin mag di vota òf si bo ta ekskluí di vota.
Kiko mi mester pa vota?
Bo mester di un karchi di vota pa por vota. Dieskuater dia promé ku elekshon, bo entidat públiko lo manda bo bo karchi di vota.
Ku bo karchi di vota, bo por vota na kualke urna den bo entidat públiko.
Tambe bo mester di un prueba di identidat. Esaki por ta:
- bo pasaporte Hulandes,
- bo sedula (emití dor di Boneiru, Sint Eustatius òf Saba),
- bo reibeweis (emití dor di Boneiru, Sint Eustatius òf Saba),
- bo dokumentu di stranhero.
E dokumentu no por ta kaduká pa mas ku 5 aña.
Unda mi por vota?
Riba bo karchi di vota tin pará kua urna ta esun mas serkano. Tambe lo bo haña un lista na kas di tur e adresnan unda bo por vota.
Mi por vota den un otro entidat públiko òf munisipio?
Esaki por. Por ehèmpel, si bo ta biba na Boneiru i ke vota na St. Eustatius, bo por apliká pa un karchi di votado serka bo entidat públiko.
Ku e karchi aki, bo por vota na Boneiru, Sint Eustatius, Saba i Hulanda Europeo.
Pa ken mi por vota?
No mas tardá ku dieskuater dia promé ku un elekshon, bo lo risibí un lista di kandidato di bo entidat públiko. E lista aki ta kontene nomber di e partidonan i nan kandidatonan. Riba e lista aki bo por mira pa ken bo por vota.
Kon mi tin ku vota?
Bo ta risibí un papel di vota na e urna. Bo ta usa e papel aki den e hòki di vota pa skohe bo kandidato ku un pòtlot kòrá. Despues, dobla e papel di vota di manera ku bo eskoho no ta visibel i hinka esaki den e buzon di vota.
E hòkinan di vota den e urna mester ta posishoná di manera ku niun hende no por mira pa ken bo ta vota. Si bo tin un desabilidat físiko, bo por risibí asistensia den e hòki di vota.
Un otro persona por bai vota pa mi?
Esaki por. Por ehèmpel, si bo ta malu òf ta ku fakansi den eksterior, bo por apodera un otro persona pa vota pa bo.
Kon mi por apodera un persona?
Si abo i e persona apoderá ta biba den e mesun entidat públiko, mester firma e parti patras di e karchi di vota huntu.
E persona apoderá mester trese bo karchi di vota i un kopia di bo dokumentu di identidat na e urna. E persona apoderá tambe mester mustra su dokumentu di identidat.
Bo ke apodera un peresona di un otro entidat públiko òf munisipio?
Serka bo entidat públiko bo por pidi un formulario di apoderashon. Abo i e apoderado ta firma e formulario i entrega esaki na bo entidat públiko. E apoderado lo risibí un prueba di apoderashon, ku ta permití nan pa vota den bo nòmber. Por entrega e formulario te ku sinku dia prome ku dia di elekshon.
Pregunta?
Bo tin pregunta tokante elekshon? Bishita bo entidat públiko. Bo por bai un intérprete di Idioma di Seña Hulandes pa esaki.